Monday, December 12, 2011

Ohaa.... sa, dua, tiga, empat, lima enam .. tuuujuh aaaaa... anang guai nyingkang kita aya enggau bulang kaki bejalai, Uji tentang kita anak gantong tengkebang ampang belulai,Ngetu dulu anang bejako kita ke indu serta anang ragak kita nembiak.

Enda aku busong ngelangkah gunong, enda aku tulah ngelangkah tanah, enda aku danjan ngelangkah bulan, enda aku tumbang ngelangkah bintang!
Kaki aku udah bediri di segi besi belumpong, nyawa aku nyapa nyembah di klasah tikai bedong long. Lengan kanan aku ditanggam beringan lanchum selong, pala aku di-bap singkap jalong jabong, blakang aku ditinggang seludang baju burong.

Laban aku tu ukai mungkal ukai nanjal, aku tu endang niti endang nali, baka ijok tampung penduk, baka rutan tampung danan, baka ira tampung lemba, baka wi tampung tali.
Aku ga nyidi singkang bekau kaki, nitih pantap abi jari, pecah periuk tanah ganti periuk tani, padam bulan diganti matahari, parai orang ka tuai ganti tubuh kami, pambu orang ka dulu ganti kami ka dudi.

Nitih ka pekat, nguan adat, ngibun durok kitai bansa, negi ka menira ugama menoa pekat adat 1Malaysia, digaga Datuk Seri Najib, Menteri Besai Menoa MalaysiaNgambika tampak rita, ditemu antu tebilang di dunya.

Nama brita bala kaban menyadi aku? Taun 2011 semak deka abis, nyadi taun 2012 udah ba sukut. Jangka ba taun 2011, mayoih udah dipeda enggau pengulih ka udah di asai. Kita sama bela nemu, tim main bol Malaysia, Harimau Malaya udah nyadi champion maya Asean Games di Jakarta, Indonesia pia mega Negeri Sembilan jadi juara Piala Malaysia.

Enti kitai berati mayoih agi ka udah di ulih kitai, nya alai taun ti deka datai tu ngambi ke ulih nyadi kelai ke pemansang kitai siko-siko. Menoa kitai mansang agi, nya alai anang enda keran agi ngasoh anak kitai angkun agi sekula ngambi bulih pemandai enggau pengelandik. Kita sama bela meda, nembiak rebak dudi enti nadai sekula, anyut meh sekeda kreja kuli deh ngiga urang ka bisi pengelandik jari. Kena aku ngujung ka jako aku, nyadi leka tu ila, kitai sama bulih pengeraja, bulih reta tengkira, bala anak bulih pemandai, bulih diploma, iya ka landik bulih degree enggau Ph. D.... ooohhaa.

Wednesday, January 5, 2011

Selamat Taun Baru 2011

Selamat Taun Baru 2011 enggau Tabi semua,

Sebedau aku ke ujung agi, enda laun jangka aku madah ke "Selamat Taun Baru 2011". Tabi kaban - menyadi ke di Sri Aman, Lubok Antu, Betong enggau di Saratok, nama brita? Baka ni ke pemujur pengawa, buah enggau padi kitai. Amat pan aku udah jauh di Kuala Lumpur, tang ati seruran begulai enggau bala kita. Enda lama ke udah aku tekejut bedar ningga brita Abang Maslie ke udah nadai, sinu aku ningga. Arap ke Roh iya begulai enggau Tuhan, iring ke famili iya enggau beri berkat. Amen

Ngagai bala-bala menyadi, kaban ke lama enda dipeda, sida di Munggu Demam, Ng. Jela, Pakit, Ng. Bunu, nama enda alah sebut. Terus ke pengawa, ransing agi ngambi ke maju baka urang bukai.

Ngagai semua staf di Sri Aman, Lubok Antu, Betong enggau Saratok, anang enda ngirum brita selalu, nombor handphone aku bedau sama.

Pengunjung iya, selalu berhubung au.



casigat,
Kuala Lumpur.